Sa isang press conference noong Nob. 21, ipinagtanggol ni Justice Secretary Boying Remulla ang desisyon ng delegasyon ng Pilipinas na tanggihan ang rekomendasyon ng United Nations Human Rights Council na i-decriminalize ang aborsyon.
“Kailangan nating pag-usapan pa nang husto ang polisiya ng population growth kasi may lumalabas na may mga benepisyo at mayroong mabuti at masama kaugnay ng pagkakaroon ng malaking populasyon. Minsan kailangan nating tingnan mula sa pananaw na maganda rin na may malaking populasyon,” sinabi niya.
Ang pahayag ni Remulla ay lumabas anim na araw matapos ipanganak ang simbolikong ika-walong bilyong sanggol sa Dr. Jose Fabella Memorial Hospital sa Tondo, Maynila noong Nob. 15.
Habang patuloy na lumalaki ang populasyon ng mundo, narito ang tatlong bagay na kailangan mong malaman tungkol sa populasyon ng bansa:
1. Ano ang hitsura ng populasyon ng mga Pilipino ngayon?
Binanggit ni Juan Antonio Perez III, executive director ng Commission on Population and Development, ang tatlong dahilan ng pagbaba ng mga rate ng kapanganakan mula noong 2020: pinipili ng mga babae at mag-asawa na ipagpaliban ang panganganak, mas kaunti ang nag-aasawa at bumubuo ng pamilya, at pagtaas sa paggamit ng modernong paraan sa pagpaplano ng pamilya.
Sa isang media briefing noong Mayo 25, sinabi ni Perez na ang bansa ay sumasailalim sa demographic transition, na maaaring mangahulugan ng mas malaking populasyon ng nagtatrabaho sa mga darating na taon.
“Ang mataas na fertility levels ng huling dalawang dekada ay inaasahang lumikha ng isang umbok ng mga kabataan na papasok sa workforce hanggang 2035,” sabi niya.
Gayunpaman ang mga paunang resulta ng 2021 Young Adult Fertility and Sexuality Study ng University of the Philippines Population Institute (UPPI) ay nagpapakita na 20% lamang ng mga Pilipinong nasa edad 15 hanggang 24 ang pumasok ng kolehiyo para mag-aral. Humigit-kumulang 40% ang umabot lamang sa junior high school, o Grades 7 hanggang 10.
2. Disadvantage ba ang pagkakaroon ng populasyon na mahigit 110 milyon?
Sinasabi ng mga eksperto na ang malaking populasyon ay hindi naman kailangang maging isang problema.
“Ang eksklusibong pagtutok sa mga kabuuan ng populasyon at mga growth rate ay nakakaligtaan, at madalas na humahantong sa pagpilit at kontra-produktibong mga hakbang at ang pagguho ng mga karapatang pantao,” sabi ni United Nations Population Fund Executive Director Natalia Kanem sa pagdiriwang ng World Population Day noong Hulyo 11.
Sa parehong kaganapan, binigyang-diin ni Perez ang kahalagahan ng kabataang Pilipino at ang kanilang potensyal na makapag-ambag ng malaki sa ekonomiya.
“Bumubuo sila ng isang malaking mapagkukunan ng tao na ang pakikilahok bilang epektibong mga manggagawa ay magsisilbing mga driver para sa karagdagang paglago ng ekonomiya ng bansa sa mga darating na taon,” sabi niya.
Ang paglago ng ekonomiya na nagreresulta mula sa mas maliliit na sambahayan at mas malaki, mas batang nagtatrabaho na populasyon ay tinutukoy bilang “demographic dividend.” Gayunpaman, sinasabi ng mga eksperto na habang ang isang transition na katulad ng nangyayari sa Pilipinas ay ginagawang posible ang isang demographic dividend, ang mga benepisyo nito ay hindi awtomatikong dumarating.
Sa side event ng 55th Session ng United Nations Commission on Population and Development noong Abril 21, sinabi ni Michael Del Mundo ng UPPI na tatlong rehiyon lamang sa Pilipinas — Metro Manila, CALABARZON at Cordillera Administrative Region — ang nasa posisyon na makinabang mula sa isang potensyal na demographic dividend.
Ipinaliwanag niya na ang ibang mga lugar sa bansa ay nahaharap sa mga katulad na hamon ng mataas na fertility rate, mababang partisipasyon ng kabataan at babae sa labor force, at kawalan ng mataas na pinag-aralan na mga manggagawa.
3. Ano ang kailangang gawin ng Pilipinas upang umani ng benepisyo mula sa malaking populasyon?
Para masulit nang husto ang demographic dividend, sinabi ni Del Mundo na dapat bilisan ng bansa ang transition nito sa pamamagitan ng pagbabawas ng fertility at mortality rates. Ang pamahalaan ay dapat ding magbigay ng mas magandang pagkakataon sa ekonomiya sa pamamagitan ng de-kalidad na edukasyon at pinabuting financial literacy.
“Ang mas mahusay na edukasyon ay maaaring humantong sa mas mahusay na trabaho, mas maraming kita. Ang mas mahusay na edukasyon ay maaaring makaapekto sa financial literacy at kanilang fertility behavior,” sabi ni Del Mundo.
Ito rin ang sinabi ni sociologist at Ateneo de Manila University Professor Emeritus Ricardo Abad sa kanyang 2020 magisterial lecture kung saan inilarawan niya ang kalidad ng edukasyon bilang isang “necessary precondition” para sa paglago ng ekonomiya. Binigyang-diin niya na ang kalidad ng edukasyon ay humahantong sa mas mataas na kita ng indibidwal at hinihikayat ang aktibong pakikilahok sa lipunan.
“Gusto mo ng mas maraming volunteerism, gusto mo ng higit na interpersonal na tiwala, gusto mo ng mas maraming partisipasyon sa pulitika sa bansa, kung gayon ang edukasyon ay isang magandang paraan upang makamit ang mga bagay na ito,” aniya, at idinagdag na ang isang mas edukadong populasyon ay mag-uudyok din ng pagbabago.
Binigyang-diin ni Del Mundo na ang kita ng mga tao ay dapat mag-iwan ng puwang para sa pag-iimpok at pamumuhunan upang matiyak ang pataas na economic mobility para sa mga sambahayan.
Binanggit ni Bagong Henerasyon Partylist Rep. Bernadette Herrera sa pagdiriwang ng World Population Day 2022 na nakabinbin sa House of Representatives ang mga panukalang batas na naglalayong isingkaw ang potensyal na demographic dividend ng Pilipinas, tulad ng Adolescent Pregnancy Prevention Bill.
Nakakita ka na ba ng anumang kahina-hinalang pahayag, larawan, meme, o online post na gusto mong i-verify namin? Sagutan ang reader-request form na ito.
Mga Pinagmulan
Department of Justice official Facebook page, WATCH | Justice Secrerary Jesus Crispin Boying Remulla holds a press conference – 21 November 2022, Nov. 21, 2022, watch from 1:07:05 to 1:07:55
INQUIRER.net, UNHRC asks PH to decriminalize abortion as data show ban ineffective, deadly, Nov. 7, 2022
ABS-CBN News, PH report on rights improvement not convincing, UN review shows, Nov. 15, 2022
CNN Philippines, UN human rights experts to PH gov’t: Decriminalize abortion, legalize divorce, Nov. 6, 2022
Commission on Population and Development, POPCOM: Filipino children’s population declined in last 20 years: While seniors comprise 8.5% of PHL population as of 2020, accessed on Nov. 21, 2022
Commission on Population and Development, POPCOM: Rise in mortality, drop in birth rates caused by COVID-19 and its impact on local health system, Strongly debunks ‘depopulation thru vaccination’ theories, accessed on Nov. 23, 2022
Philippine Statistics Authority, Age and Sex Distribution in the Philippine Population (2020 Census of Population and Housing), August 12, 2022
Philippine Statistics Authority, Household Population, Number of Households, and Average Household Size of the Philippines (2020 Census of Population and Housing), March 23, 2022
University of the Philippines Population Institute, Zoom In, Zoom Out: National Dissemination Forum for the 2021 Young Adult Fertility and Sexuality Study (FAFS5), Oct. 14, 2022
United Nations Population Fund Philippines, Population Dynamics, accessed on Nov. 23, 2022
BKKBN Official YouTube channel, Side Event The 55th UN-CPD Session Economic Development & Demographic Dividend Among ASEAN Countries, April 21, 2022
Areté Ateneo official YouTube channel, Magisterial Lectures | Ricardo G Abad PhD – Demography and Human Capital: Why Education Matters, Oct. 10, 2020
House of Representatives official website, HB00079, June 30, 2022
(Ginagabayan ng code of principles ng International Fact-Checking Network sa Poynter, ang VERA Files ay sumusubaybay sa mga maling pahayag, flip-flops, nakaliligaw na mga pahayag ng mga pampublikong opisyal at kilalang personalidad, at pinasisinungalingan ang mga ito gamit ang tunay na ebidensya. Alamin ang inisyatibong ito at aming pamamaraan.)
