May article at video sa iba’t ibang social media platform na ipinakakalat na kinasuhan daw ni Pangulong Bongbong Marcos ang kapatid niyang si Senadora Imee Marcos at hinatulan daw ng habambuhay na pagkakulong. Hindi ito totoo.
Noong Nov. 18 ipinakalat ang article at video sa YouTube, Facebook at isang website. Isa sa mga post ay may pamagat na:
“HABANG BUHAY NA KULONG! GRABE SEN. IMEE MARCOS! KINASUHAN NI PBBM! WALANG PIYANSA! KAKAPASOK LANG!”
Para lalong pukawin ang damdamin ng mga tao, ipinakita pa ang picture ni Imee na umiiyak. Pero ang picture kuha ay noon pang 1993 at walang kinalaman sa isyu.
Hindi totoo ang sinasabi ng video at article, at clickbait lang ang pamagat. Hindi sinampahan ni Bongbong ng kahit anong kaso si Senadora Imee.
Sumiklab ang kontrobersiya noong Nov. 17 sa rally ng Iglesia ni Cristo, kung saan kinumpirma ni Imee ang chismis na adik sa cocaine si Bongbong.
Ayon kay Imee, nakasama ang adiksiyon ni Bongbong sa pagdedesisyon nito kaya nadagdagan ang korapsyon sa administrasyon.
Agad itong pinasinungalingan ng mga opisyal ng pangulo. Noong Nov. 18, sa press briefing ng Presidential Communications Office, sinabi ni Undersecretary Claire Castro na walang plano ang Malacañang na kasuhan si Imee.
Ayon kay Usec. Castro, “Let us check first all the facts and the statements that she made. And it’s up to the DOJ, maybe Ombudsman, if they will make any initiative to end this matter.” (Titingnan muna namin lahat ng pinagsasabi niya, at nasa DOJ o Ombudsman na kung may gagawin silang kahit ano para tapusin ang isyu.)
Ang video ay ini-upload ng YouTube channel na Boss Balita TV (ginawa noong July 15, 2021) at may lagpas 85,000 views at 4,600 engagements. Ini-repost ito ng Facebook page na Showbiz Whispers (Aug. 1, 2024) at website na newsjer.com.
