Categories
Fact Check Filipino

VERA FILES FACT CHECK: Sen. Bato Dela Rosa hindi totoo ang sinabi na ang lethal injection ay ang ‘universally accepted mode’ ng parusang kamatayan

Lethal injection ang pangkalahatang tinatanggap na paraan ng parusang kamatayan.

Ronald “Bato” Dela Rosa 08/03/2022 Hindi totoo

Walang “universally accepted” na paraan ng pagpapatupad ng parusang kamatayan. Sa katunayan, 123 state-parties sa United Nations, kabilang ang Pilipinas, ang bumoto para sa pandaigdigang suspensiyon ng parusang kamatayan sa isang resolusyon noong Dis.16, 2020.

Ang kamatayan sa pamamagitan ng pagbitay ay ang paraan na ginagamit sa walo sa 16 na bansa na patuloy na nagsasagawa ng parusang kamatayan, ayon sa ulat ng Amnesty International noong 2021.

Sa pagsusulong ng panukalang batas na magbabalik ng parusang kamatayan para sa malakihang ilegal na trafficking ng droga, sinabi ni Sen. Ronald “Bato” Dela Rosa na ang lethal injection ay ang “universally accepted” na paraan ng parusang kamatayan. Mali ito.

PAHAYAG

Sa panayam sa The Source ng CNN Philippines, tinanong si Dela Rosa ng anchor na si Pinky Webb kung ang mga nahatulang illegal drug trafficker at drug lord ay mabibigyan ng lethal injection sa ilalim ng inihain niyang death penalty bill. Sumagot ang dating hepe ng pambansang kapulisan:

“Yes. Lethal injection is the universally accepted mode of carrying out death penalty, so okay tayo d’yan. We have to abide by that convention.”

 

(Oo. Lethal injection ang universally accepted mode ng pagpapatupad ng parusang kamatayan, kaya okay tayo d’yan. Kailangan nating sumunod sa convention na iyon.)

 

Pinagmulan: CNN Philippines Official Youtube Channel, Sen. Bato dela Rosa | The Source, Agosto 3, 2022, panoorin mula 25:33 hanggang 25:45

ANG KATOTOHANAN

Walang “universally accepted” mode ng pagpapatupad ng death penalty. Sa katunayan, 123 state-parties sa United Nations, kabilang ang Pilipinas, ang bumoto para sa pandaigdigang suspensiyon ng parusang kamatayan sa isang resolusyon noong Dis. 16, 2020.

Ang kamatayan sa pamamagitan ng pagbitay ay ang paraan na ginagamit sa walo sa 16 na bansa na patuloy na nagsasagawa ng parusang kamatayan, ayon sa ulat ng Amnesty International noong 2021.

 

 

Method Country
Bitay Bangladesh, Botswana, Egypt, Iran, Iraq, Japan, South Sudan, United Arab Emirates (UAE)
Firing squad Belarus, China, North Korea, Somalia, Yemen
Lethal injection China, USA, Vietnam
Pagpugot ng ulo Saudi Arabia

 

Pinagmulan: Amnesty International, Death sentences and executions 2021, Mayo 24, 2022

Sa United States, naitala mula noong 1976 ang 1,368 executions sa pamamagitan ng lethal injection, ayon sa Death Penalty Information Center, na nagsabing ito ang “pangunahing pamamaraan” ng parusang kamatayan sa mga state na may death penalty.

 

Nakakita ka na ba ng anumang kahina-hinalang pahayag, larawan, meme, o online post na gusto mong i-verify namin? Sagutan ang reader-request form na ito.

 

Mga Pinagmulan

CNN Philippines Official Youtube Channel, Sen. Bato dela Rosa | The Source, Aug. 3, 2022

United Nations Digital Library, Moratorium on the use of the death penalty : resolution / adopted by the General Assembly, Dec. 16, 2020

Commission on Human Rights, Statement of Commissioner Karen Gomez-Dumpit on the United Nations General Assembly Resolution on Moratorium on the Use of the Death Penalty, Dec. 17, 2020

Amnesty International, Death sentences and executions 2021, May 24, 2022

Amnesty International, Who We Are, Accessed Aug. 3, 2022

Death Penalty Information Center, Fact Sheet, July 29, 2022

Death Penalty Information Center, About Us, Accessed Aug. 3, 2022

Death Penalty Information Center, State by State, Accessed Aug. 3, 2022

 

(Ginagabayan ng code of principles ng International Fact-Checking Network sa Poynter, ang VERA Files ay sumusubaybay sa mga maling pahayag, flip-flops, nakaliligaw na mga pahayag ng mga pampublikong opisyal at kilalang personalidad, at pinasisinungalingan ang mga ito gamit ang tunay na ebidensya. Alamin ang inisyatibong ito at aming pamamaraan.)