Kung ang umiiral na 1987 Philippine Constitution lang ang masusunod, walang political dynasty na mananatili at mamamayani sa bansa.
Pero, halos 40 taon matapos pagtibayin ang Konstitusyon, walang umusad na anti-political dynasty bill sa Kongreso, na binubuo ng mga mambabatas mula sa mga political dynasty. Dahil walang batas na nagbabawal sa kanila, lalong dumami ang mga political dynasty at tumindi ang kapit nila sa kapangyarihan sa lahat ng antas ng pamamahala sa buong bansa.
Ayon sa mga pag-aaral, 75% ng miyembro ng Kongreso, 85% ng mga gobernador, at 66% ng mga alkalde sa buong bansa ay mula sa Kamaganak, Inc. Ang pinakamahihirap na probinsya ay pinamumunuan ng mga dynasty.
Sinundan ng VERA Files ang isang mukha ng political dynasty sa Irosin, Sorsogon, at ang pagsisikap ng isang dating community doctor-turned-mayor na hadlangan ang pagpasok nito sa kanyang bayan.
