VERA FILES FACT CHECK: Sabi ni Duterte dapat magsama na ang 'Yellow' at 'Reds'; wala itong kabuluhan

Basahin sa Ingles

Sinabi ni Pangulong Rodrigo Duterte na ang Liberal Party at "mga komunista," parehong mga kritiko ng kanyang administrasyon, ay may "parehong ideolohiyang anuman."

Hindi tumutugma sa kanyang masaklaw na pahayag ang kamakailan at nakaraang kasaysayan, at sa katunayan, ang mga kasalukuyang pangyayari ay nag-uugnay sa pangulo mismo, hindi sa kanyang mga kritiko tulad ng kanyang sinasabi, na mas malapit sa mga grupo ng komunista.

PAHAYAG

Sa isang speech noong Okt. 12 sa Malacañang, hinimok ni Duterte ang mga "Yellow" at ang "Reds" na magkaisa laban sa kanya. Yellow ay ang kulay na nauugnay sa Liberal Party, red sa mga grupo ng komunista.

Sinabi ni Duterte:

"Magiging masaya ako talaga kung magsisimula silang magsama sa isang grupo. Itong mga komunista at ito Liberal. Sa ito, yung iba na gustong paalisin ako. Mag-isa-isa na lang kayo, isang grupo. Sa palagay ko pareho kayo ng ideolohiyang kung anuman para hindi na masyadong mag-kalat ang ano.

Pinagkunan: Speech ni President Rodrigo Roa Duterte sa Relaunch ng Malacañang Press Briefing Room, Okt. 12, 2017, panoorin mula 9:01-9:39

FACT

Ang pahayag ni Duterte na ang mga komunista at Liberal Party ay may "parehong"" ideolohiya ay hindi kapanipaniwala kung isaalang-alang ang kamakailang kasaysayan ng pulitika.

Ang negosasyon ng pangkapayapaan sa pagitan ng mga rebeldeng komunista at ng gobyerno ng Pilipinas sa ilalim ng dating pangulo Benigno S. Aquino III, ang hinalinhan ni Duterte at lider ng Liberal Party, ay naudlot dahil sa, kabilang ng iba pa, ang mga pagkakaiba sa ideolohiya.

Sa isang pahayag na inilabas noong Mayo 28 noong nakaraang taon, inakusahan ni Luis Jalandoni, pinuno ng National Democratic Front of the Philippines (NDFP), ang pampulitika sangay ng Communist Party of the Philippines (CPP), ang administrasyong Aquino ng pagtalikod sa usapang pangkapayapaan.

Ang pahayag, na nai-post sa website ng NDFP, ay nagsabi:

"Ipinilit ni Alexander Padilla, sa negosasyon noong Peb. 25, 2013, na ang 'reporma sa lupa at pambansang industriyalisasyon' ay mga 'konsepto na kargado ng ideolohiya' at samakatuwid ay hindi katanggap-tanggap sa (pamahalaan ng Pilipinas)."

Pinagkunan: Aquino distorts facts on peace talks with the NDFP

Si Padilla ay pinuno ng negotiating panel ng gobyerno noong panahong iyon.

Tinuligsa ni CPP founding chair Jose Maria Sison din si Aquino, at sa isang video na na-post sa website ng NDFP ay nagsabi:

"Si Aquino, napatunayan na sya pala ay bulok, ipokrito, nagsasabi na siya ay naninindigan para sa 'tuwid na daan,' baluktot pala ang daan na niya. "

Pinagkunan: NDFP calls for moral regeneration, system change, panoorin mula 2:01-2:12

Sa kabaligtaran, si Duterte, nang manalo sa pagkapangulo, ay inalok ang CCP ng apat na posisyon sa Gabinete, at malugod na tinanggap ang planong pagbabalik ni Sison sa Pilipinas mula sa kanyang pagkadistiyero sa The Netherlands. Si Duterte ay dating estudyante ni Sison sa Lyceum of the Philippines.

Ang administrasyong Duterte ay muling binuksan ang negosasyong pangkapayapaan sa mga rebeldeng komunista, at sa kanyang unang State of the Nation Address (SONA) noong Hulyo 26 noong nakaraang taon inihayag ang tigil-putukan mula sa panig ng gobyerno at New People’s Army (NPA), ang armadong grupo ng CPP.

Ang gobyerno ng Pilipinas at ang NDFP ay umabot sa ika-apat na round ng pormal na pag-uusap noong Abril 2017 bago sumama ang takbo at kanselahin ng gobyerno ang susunod na pag-uusap, dahil sa isang direktiba ng CPP na paigtingin ang mga pag-atake kasunod ng deklarasyon ng batas militar ni Duterte sa Mindanao. (Tingnan ang VERA FILES SONA PROMISE TRACKER: Peace process)

Sa kanyang ikalawang SONA noong Hulyo 24, kalaban na ang tingin ni Duterte kay Sison, tinawag niya itong matanda at may sakit, bago sinabing walang pinupuntahan ang usapan. (Tingnan ang VERA FILES FACT CHECK: Peace or war?)

Ang pagtawag ng presidente sa kanyang mga kritiko na "mga komunista" ay mukhang di-makatuwiran kapag isinaalang-alang ang mga galaw kamakailan ng kanyang partidong pampulitika.

Ang PDP Laban, na pinangunahan ni Duterte, sa isang pahayag sa media noong Okt. 18 ay inihayag na ito ay pumirma sa isang "makasaysayang kasunduan" kasama ang United Russia, ang naghaharing partido ng Russian Federation, upang "mapalakas ang diplomatikong ugnayan sa pamamagitan ng relasyon sa mga naghaharing partido ng ibang mga bansa."

Ang Russia ay dating komunista, ngunit mas mahalaga, sinabi ng pahayag sa media na ang kasunduan ay ang ikalawang memorandum na pinirmahan ng PDP Laban kasama ang isang dayuhang partidong pampulitika.

"Ang una ay ang Memorandum of Agreement sa pagitan ng PDP Laban at ng Communist Party of China, na pinirmahan noong Pebrero ng taong ito," dagdag nito.

Mula PDP Laban

Si Duterte sa maraming mga speech ay nagpahayag na siya ay isang maka-kaliwa at isang "sosyalista" ngunit hindi isang miyembro ng CPP.

Sa speech noong Abril 5, sinabi niya:

"Kaya't doon ako tumakbo kasi PDP man talaga ako ngunit ako ay isang leftist/maka-kaliwa. Lagi akong kasama ng kaliwa kasi anak lang ako ng mahirap at hindi ko kailanman ikinaila ngunit hindi ako miyembro ng Communist Party of the Philippines. Isipin mo ako. Sosyalista ako. "

Pinagkunan: Presidential Communications Operations Office

BACKSTORY

Sa masaklaw na pahayag ni Duterte kanyang binalikan ang pambobomba sa Plaza Miranda noong 1971, isang marahas na kabanata sa pampulitikang kasaysayan ng Pilipinas na sangkot ang Liberal Party at diumano'y ang CPP:

"Noong Agosto 21, 1971, sa miting de avance ng Liberal Party sa Plaza Miranda, ang parisukat ay naging eksena ng dalawang magkasabay na pagsabog ng granada na halos buwagin ang liderato ng partido, nang si Senador Roxas, ang pangulo ng Liberal Party, ay ipinoproklama ang mga kandidato ng kanyang partido para sa Lungsod ng Maynila. Kabilang sa mga nagtamo ng malubhang mga sugat ay sina Roxas, Osmeña, Senador Jovito Salonga, Genaro Magsaysay, Eva Estrada-Kalaw (isang Nacionalista na guest candidate ng LP), at mga kandidato para senador na sina John Henry Osmeña at Ramon Mitra Jr. "

Pinagkunan: The Official Gazette, A history of the Philippine political protest

Ang pambobomba, kabilang sa mga pangyayari na sinasabing naging mitsa ng deklarasyon ng batas militar ni Ferdinand Marcos, ay unang inisip na kagagawan ng namayapang diktador.

Gayunman, sa isang ulat noong 1989 ng mamamahayag na si Gregg Jones na inilathala sa The Washington Post isinisi ito sa CPP:

"Ang tunay na kuwento ng pambobomba ng Plaza Miranda, kasama ang iba pang matagal na mga lihim ng (CPP), ay nabuo mula sa magkakahiwalay na pakikipanayam sa walong dating matataas na opisyal nito sa loob ng higit sa isang taon ng pananaliksik sa kilusan ng rebelde. Ang dating mga opisyal, apat sa kanila ay mga kasapi ng namumunong Central Committee bago ang kanilang pag-aresto noong dekada 1970, ay inamin na ang pambobomba ay gawa ng mga operatiba ng partido na kumikilos sa mga utos ng founding chairman ng gerilyang organisasyon na si Jose Maria Sison. Inilarawan nila kung paano pinlano ng pamunuan ng partido - at tatlong operatiba ang nagsagawa - ang pag-atake sa pagtatangka na patindihin ang panunupil ng gobyerno at itulak ang bansa sa bingit ng rebolusyon. "

Pinagkunan: The Washington Post, Ex-communists party behind Manila bombing

Nagtapos ang ulat:

"Ngunit (si Sison) ay tumigil sa tahasang pagtanggi sa kinalaman ng partido (sa nangyari). Sa halip, isinara niya ang paksa sa pamamagitan ng pag-uulit ng pampublikong posisyon ng partido tungkol sa bagay na ito: na ang Liberal Party 'noong panahong iyon ay tila aming kaalyado.'"

Sa ngayon, itinatanggi ni Sison ang akusasyon, at sa isang pakikipanayam noong 2016 sinabi na si Jones ay kinomisyon ng United States Central Intelligence Agency (CIA) upang isulat at "sisihin ang insidente sa Plaza Miranda sa akin upang sirain ang Communist Party of the Philippines at ang rebolusyonaryong kilusan. "

Itinanggi rin ni Sison sa parehong panayam na ang dating senador Benigno "Ninoy" Aquino Jr ay kabilang sa mga tagapagtatag ng CPP, at siya at si Sison ay magkasamang nagplano ng pagbomba sa Plaza Miranda.

Si Aquino, isang miyembro ng Liberal Party at ang nangungunang oposisyon sa panahon ni Marcos, ay wala sa Plaza Miranda nang mangyari ang pambobomba.

"Si Ninoy Aquino ay hindi maaaring maging isang komunista o tagapagtatag ng CPP. Kilala siya bilang tauhan ng CIA mula pa noong siya ay isang war correspondent sa Korea," sabi ni Sison.

Sinabi ng CIA, sa declassified na dokumento na inihanda kasunod ng asasinasyon kay Aquino noong Agosto 21, 1983 na isinisi ni Marcos sa CPP:

"Gayunpaman, sumasang-ayon kami sa paniniwala ng gobyerno na may mas mapapala ang mga Komunista sa pagkamatay ni Aquino. Ang mas maigting na aktibidad ng National Democratic Front, ang hindi lihim na organisasyon ng CPP, ay may katibayan na sa mga kampus ng kolehiyo."

Pinagkunan: CIA Library, Aquino's Assassination: Implications for Stability in the Philippines

Mga miyembro ng Liberal Party sa Plaza Miranda. Mula sa malacanang.gov.ph

Ang pagsasama-sama ng mga pampulitikang mga kaaway at ang pagtawag sa kanila na "mga komunista" ay hindi inumpisahan ni Duterte. Ginawa na ni Marcos ito noon.

Sa isang kabanata sa aklat na Crisis in the Philippines: An analysis of the Marcos era and beyond, ang iskolar na si Lela Garner Noble ay nagsusulat na nang magsimula ang mga protesta laban sa kanya:

"Nang parami nang parami, (si Marcos) ay madaling bumuo ng matibay na pagkakaiba sa pagitan ng mga tagasuporta at mga kaaway. Kahit na ang huli sa kategorya ay sunud-sunuran at kasama sa iba't ibang panahon hindi lamang mga estudyante kundi mga lider ng unyon, mamamahayag, pulitiko, mga rebeldeng Muslim, oligarke, mga taong simbahan, at mga banyagang pamahalaan na may iba't ibang mga ideolohikal na orientasyon, ang 'mga kaaway' ay kadalasang nangangahulugang 'mga komunista,' na ang matinding mga pagkilos ay mabibigyang-katwiran."

Mga pinagkunan:

PCOO, Speech of President Rodrigo Roa Duterte during the Relaunch of the Malacañang Press Briefing Room

PCOO, Speech of President Rodrigo Roa Duterte during the 29th Annual National Convention of the Prosecutors League of the Philippines

NDFP, Aquino distorts facts on peace talks with the NDFP

NDFP, NDFP calls for moral regeneration, system change

The Official Gazette, A history of the Philippine political protest

The Washington Post, Ex-communists party behind Manila bombing

CIA Library, Aquino's Assassination: Implications for Stability in the Philippines

josemariasison.org, Joma Sison Interview on Martial Law and the Plaza Miranda Bombing

Philippine Daily Inquirer, Duterte: 4 Cabinet posts open to Reds

Philstar.com, Joma Sison welcomes Duterte’s offer of peace, but declines Cabinet position

CNN Philippines, Duterte offering Cabinet posts to the CPP

Crisis in the Philippines: An analysis of the Marcos era and beyond, 1986, Princeton University Press

(Ang VERA Files Fact Check ay sumusubaybay sa mga maling salaysay at nakaliligaw na mga pahayag ng mga pampublikong opisyal at personalidad, at itinatama ang mga ito gamit ang mga tunay na ebidensya. Kami ay ginagabayan ng mga prinsipyo ng International Fact-Checking Network sa Poynter. Para sa karagdagang impormayan bisitahin ang pahinang ito.)

FOR FURTHER READING

VERA FILES FACT CHECK: Bumaligtad ba si Duterte sa 'coalition government' kasama ang CPP, tulad ng sabi ni Sison?

Tama si Sison tungkol sa pagbabago ng isip, pero mali ang pagkakataon.

VERA FILES FACT CHECK: Duterte says ‘Yellows’ and ‘Reds’ should merge; that doesn’t make sense

Recent and distant history do not bear out the president's blanket claim.

VERA FILES FACT CHECK: Duterte bumaligtad sa pambu-bully sa mga komunista

Umakyat siya sa entablado at hinarap ang mga aktibista at militanteng grupo, at binawi ang kanyang…

About Vera Files

Founded in March 2008, VERA Files is published by veteran Filipino journalists taking a deeper look into current Philippine issues. Vera is Latin for “true.”

Follow us

MEMBER