Sinabi ng manunulat ng Manila Bulletin na si Krizette Laureta-Chu sa isang Facebook post noong Dis. 11 na hindi mahanap ng Federal Bureau of Investigation (FBI) si Pastor Apollo Quiboloy, tagapagtatag ng isang relihiyosong sekta na tinatawag na Kingdom of Jesus Christ. Ito ay nangangailangan ng konteksto.
Hindi maaaring arestuhin ng FBI si Quiboloy nang walang espesyal na pahintulot mula sa Kongreso ng United States (U.S.) at pag-apruba mula sa gobyerno ng Pilipinas.
Si Quiboloy ay nasa listahan ng pinaghahanap ng FBI dahil sa pakikipagsabwatan sa sex trafficking sa pamamagitan ng puwersa, pandaraya at pamimilit, kabilang ang mga bata; sex trafficking sa pamamagitan ng puwersa, pandaraya at pamimilit; pagsasabwatan; at bulk cash smuggling.
PAHAYAG
Tinuya ni Laureta-Chu, isang associate lifestyle editor sa Manila Bulletin, ang FBI dahil hindi nito mahanap at maaresto si Quiboloy na may mga palabas sa Sonshine Media Network International, isang media outfit na kanyang itinatag at pinamumunuan.
Sabi niya:
“Akala ko talaga magaling ang FBI. | Pero di nila kaya hanapin yung Wanted nila na si Pastor Apollo Quiboloy.”
Pinagmulan: Krizette Laureta-Chu’s official Facebook page, Akala ko talaga magaling ang FBI… (Archived), Dis. 11, 2022
Ang post ni Laureta-Chu ay umani ng kabuuang mahigit 3,800 reaksyon, 170 komento, at 16 na shares. Lumitaw ito isang araw matapos kunin ng U.S. Treasury ang mga ari-arian ni Quiboloy sa U.S. sa pamamagitan ng executive order laban sa mga dayuhang sangkot sa serious human rights abuse o katiwalian.
KATOTOHANAN
Ang FBI ay hindi maaaring gumawa ng mga pag-aresto sa labas ng U.S. o sa mga teritoryo nito nang walang mga espesyal na pahintulot mula sa U.S. Congress at sa dayuhang bansa kung saan matatagpuan ang isang kriminal.
“Sa ibang bansa, ang mga espesyal na ahente ng FBI sa pangkalahatan ay walang awtoridad na magsagawa ng mga pag-aresto maliban sa ilang mga kaso kung saan, sa pahintulot ng host country, ipinagkaloob ng Kongreso ang FBI extraterritorial jurisdiction,” nakasaad sa FBI official page.
Sinabi ng abogadong si Pacifico Agabin, dating dekano ng University of the Philippines College of Law, sa isang panayam noong Disyembre 12 sa DZMM Teleradyo na walang magagawa ang FBI tungkol kay Quiboloy maliban kung hihilingin ng gobyerno ng US ang extradition ng pastor mula sa Pilipinas.
Sinabi ni Justice Secretary Jesus Crispin “Boying” Remulla sa parehong araw na walang natatanggap na extradition request ang kanyang departamento para kay Quiboloy. Nangako siya na susundin nila ang Philippine-U.S. kasunduan sa extradition.
BACKSTORY
Ang pastor ay kinasuhan noong Nob. 10, 2021, ng Central District Court of California sa Santa Ana, California.
Inakusahan siya ng pag-oorkestra ng operasyon ng sex trafficking kung saan sistematikong ginahasa at inabuso niya ang mga personal na katulong na tinatawag na “pastorals” — ang ilan sa kanila ay menor de edad — sa loob ng isang dekada.
Nilagdaan ng Pilipinas ang isang extradition treaty sa U.S. noong Nob. 13, 1994, na nagkabisa noong Nob. 22, 1996. Ang treaty ay nagpapahintulot sa U.S. na humiling ng turn-over ng isang Filipino citizen na sinampahan ng extraditable offense na may parusang higit sa isang taong pagkakakulong sa parehong bansa, at vice versa. Ang parehong mga bansa, gayunpaman, ay maaaring tanggihan ang isang extradition request.
Nakakita ka na ba ng anumang kahina-hinalang pahayag, larawan, meme, o online post na gusto mong i-verify namin? Sagutan ang reader-request form na ito.
Mga Pinagmulan
FBI Most Wanted, APOLLO CARREON QUIBOLOY, accessed Dec. 12, 2022
Krizette Laureta-Chu’s official Facebook page, Akala ko talaga magaling ang FBI… (Archived), Dec. 11, 2022
U.S. Department of Treasury, Treasury Sanctions Over 40 Individuals and Entities Across Nine Countries Connected to Corruption and Human Rights Abuse, Dec. 9, 2022
U.S. Department of State, Combating Global Corruption and Human Rights Abuses, December 9, 2022
U.S. Government, Executive Order 13818 — Blocking the Property of Persons Involved in Serious Human Rights Abuse or Corruption, Dec. 20, 2017
FBI, What authority do FBI special agents have to make arrests in the United States, its territories, or on foreign soil? Accessed Dec. 12, 2022
ABS-CBN official YouTube channel, Kabayan | TeleRadyo (12 December 2022), Dec. 12, 2022
ABS-CBN News, DOJ says no info yet on Quiboloy sanctions from US Treasury Dept, Dec. 12, 2022
U.S Department of Justice, Federal Grand Jury Issues New Indictment Against Leaders of Philippines-Based Church that Alleges Sex Trafficking Scheme, Nov. 18, 2021
U.S. Department of State, Treaty Between the UNITED STATES OF AMERICA and the PHILIPPINES, Nov. 13, 1994
U.S. Congress, Ex. Rept. 104-29 – EXTRADITION TREATY WITH THE PHILIPPINES, accessed Dec. 12, 2022
(Ginagabayan ng code of principles ng International Fact-Checking Network sa Poynter, ang VERA Files ay sumusubaybay sa mga maling pahayag, flip-flops, nakaliligaw na mga pahayag ng mga pampublikong opisyal at kilalang personalidad, at pinasisinungalingan ang mga ito gamit ang tunay na ebidensya. Alamin ang inisyatibong ito at aming pamamaraan.)
Read other interesting stories:
Click thumbnails to read related articles.
